2017年1月6日 星期五

2016回顧及展望

2016年資產增長及投資回報:

總資產:+6.2% (包括儲蓄及借貸,不計自住樓)

淨資產:+121.6%

股票投資回報率:+11.3%

期權投資回報率:+52%

現金流:+$23,118



2016年原訂目標係總資產增長20%,結果相距甚遠,有些少失望,原因之一係工作收入減少而同時支出增加,導致儲蓄額下跌。其次因為自己太小心而錯失良機,年初股市大跌時,投資系統出現長線買入訊號,理應大手買入時卻因為恐懼而以雞仔注分批買,結果未買夠貨大市就開始回升,原本打算將持股比例增加到80%,但結果全年持股最多既時候都只有60%多啲,現金太多自然未能食盡升浪。第三個原因係年中受朋友影響開始投資期指期權,初期犯左個大錯而影響全年成績。2017年希望投資時更加有自信,要相信自已投資系統,加強耐性及紀律,當機會來到時要好好把握,免再錯失良機。

投資回報方面,森而採取比較簡單計法,將年初戶口總值同年尾對比而計出,方法唔專業,未必準確。先講股票,由於年初大市下跌時買入一批股票,到近10月既時候已有不錯回報,當時曾經認為至少有15%回報,可惜最後保持唔到,而回報中大多數來自短線交易,証明自己比較適合趨勢投資法。期權方面由於本身戶口入面少錢,基數低之下回報率顯得非常高,實際並非如此,而操作上無論股票期權還是期指期權,似乎都已經搵到一套持續可行策略,暫時覺得幾滿意,無需改變。至於現金流,股息同股票期權權金收入都符合預期,只可惜一次犯錯而影響最終結果,與心目中理想數字有好大落差,現金流係財自與否最大關鍵,未來要係呢方面做更多功夫。2017年投資方向會比較積極主動,更著重趨勢發展,更多做短線交易,現在大膽地將回報目標定於30%,希望借此推動自己更加努力。

除投資以外,2016年生活繼續平淡,每日都離唔開返工、湊仔、行街、食飯等等,或者因為人到中年生活就係咁上下。而上年唯一特別之處係透過呢個blog認識左幾位blog友,每位都獨當一面,係平時生活圈子入面冇機會接觸到既叻人,每一位身上都學到嘢。2017年期望生活會更加多姿多彩,要去多幾之旅行、食多啲好嘢、玩啲新玩意、做啲未做過既事等等,如果可以最好能夠做一兩件瘋狂既事,為自己製造啲難忘回憶。

最後想講,森而原來非常不善於做年度總結,一來記性唔好,要回想上年發生過咩事有啲困難,二來喜歡向前望,不愛舊事重提,過去就算啱又好,錯又好,都唔重要,要檢討早已經檢討,要改善應該立即改善,根本唔駛等到年尾。

45 則留言:

  1. 淨資產:+121.6%
    森而兄勁啊! 新一年加油更上一層樓!

    回覆刪除
    回覆
    1. 謝謝~只因為負債比率高才得出121%呢個數字。

      刪除
    2. 總資產+6% 而淨資產+121%

      豈不是做了20倍槓桿?

      刪除
    3. 都可以咁講,原因係將樓按計入負債,而樓價不計算資產而造成。

      刪除
    4. 那表示你的樓已升了很多又加按了...

      刪除
    5. 無錯,非常好彩,買樓買得早,加按後大大增加流動資本。

      刪除
  2. 森而兄的短線操作獨當一面,相信你2017的回報會double為243.2% 👍👍 加油!

    回覆刪除
    回覆
    1. 謝謝~
      243.2%簡直唔可能啦,除非恒指直上40000點,大家齊齊賺到癲。

      刪除
  3. 股票投資回報率:+11.3%, 已很不錯啦.

    回覆刪除
    回覆
    1. 係唔錯,但森而認自己貪心,希望更多更多。

      刪除
  4. 森而兄, 加油! 在懷疑下也要相信自己的付出, 來年賺更多 :)

    回覆刪除
    回覆
    1. 謝謝~
      懷疑自己,畏首畏尾係森而多年既弊病,好難改!

      刪除
  5. 嘩!期權回報好高,雙龍閃真係堅!

    回覆刪除
    回覆
    1. 錯覺姐,期權唔單止雙龍閃,仲包括股票期權covered call/put所收權金。

      刪除
  6. 回覆
    1. 唔利害啦,總資產增長太慢,距離財自太遠。

      刪除
    2. +6.2%已經很不錯,一家四口開支好大

      現金流的增幅是怎樣得出?

      刪除
    3. 現金流係指金額,全年股息+權金+利息-還款。

      刪除
    4. 利害呀,這樣即是完全不用依賴工作收入去還款

      刪除
    5. 只因利息低先做到,其實只要資產全數買入高息股或債券收息都一樣夠還款,無需要依賴工作收入。

      刪除
  7. 恭喜森而兄,新一年更上一層樓

    回覆刪除
  8. 點解總資產(total asset) 升6%而浄資產產(net asset=total asset -total liabilities) 可以升121%?

    大幅減債乎?

    回覆刪除
    回覆
    1. 是敢的,2015年尾做加按既時候,為方便自己計算,一并將加按金額連同原有未還清按揭列為負債,以致負債比率超過8成,所以淨資產會有咁大增幅。

      刪除
  9. 期權回報好過股票回報呢.
    刀仔剧巨龍~~~

    回覆刪除
    回覆
    1. 期權風險高回報高,唔可以重注,好難剧到巨龍,幫補下就得!

      刪除
  10. 森而兄16年既表現真係相當唔錯。
    另我個人覺得自住樓供左o固份應該計落資產度。

    回覆刪除
    回覆
    1. 自住樓我會視為日常必需品,唔會產生回報或現金流,如果將計落資產會影響實質投資回報,例如樓價上升會錯覺以為投資回報率好高。

      刪除
    2. 可以考慮分開流動及固定資產咁計,計樓價會產生錯覺,完全唔計樓價亦有欠全面

      刪除
    3. 我會將自主樓最新估值計做固定資產,按揭欠債就分為兩部份。第一部份是短期負債,就是未來十二個月的本金連利息的還款。第二部份是長期負債,就是尚欠本金減去第一部份中將會還的本金。我都係舊年年中才在資產負債表加入自住樓,當時都有寫低詳情。

      資產負債表的進化

      刪除
    4. 因為森而懶唔想計多條數,寧願唔計固定資產,如要再分長短債就太過會計公式化,個人覺得唔需要,我淨係想知自己夠唔夠錢財自,重點係流動資產同現金流。
      另外,而家層自住樓唔考慮賣,就算將來搬屋都會留比父母養老(或自己養老),既然係咁層樓值幾錢根本唔重要。

      刪除
    5. 其實森而兄咁諗都正確,供自住樓應計落日常開支,直至將層樓變現先入帳。

      刪除
    6. 都幾難變現入帳,賣出的話就等如要換樓,左手入帳右手支帳,自己又唔鍾意做收租佬。

      刪除
    7. 咁視乎自己需要啦,無興趣知就真係無謂浪費時間去計啦

      刪除
    8. 無論自住定收租樓,我都會以成本入賬,直至賣出後才一次過反映在過去數年的資產負債表上,至於中間變幅就以樓價指數的變動來分配利潤(虧損)。

      否則如果經常update估價,一來成交少根本唔準確,二來買樓槓桿大,資產淨值上落大也容易影響投資決定。因此,我的資產負債表上的淨資產和實際市價計算的淨資產經常相差50%以上。

      刪除
    9. 每個人都有自己喜歡計法,我唔計層樓做資產係因為覺得咁會更清楚知道自己實際有幾多餘錢財自或退休。

      刪除
  11. 經驗長智慧,來年一定更上一層樓!

    回覆刪除
  12. 努力,一步步就越行越出色。

    回覆刪除
    回覆
    1. 謝謝~
      能夠向多位出色blog友吸收知識定必會更出色。

      刪除
  13. 恭喜,森而兄距離目標又近一大步了.
    反而我好像整年跟沒動得一樣,原地踏步....

    回覆刪除
    回覆
    1. 唔緊要,投資係長跑,16年唔得17年再追返。

      其實我都只係近左好細步咋😅

      刪除
  14. 恭喜資產步步高升。早日財務自由。
    我仲懶緊寫總結-)

    回覆刪除
    回覆
    1. 謝謝支持,期待zero兄新文章!

      刪除